Nyanyian syukur dari Orang-orang yang ditebus TUHAN

Pslm 107 : 23 -30

Peristiwa on ima angka naung hea masa di nasida diangka na malua sian parmaraan. Jadi di endehon do on di tingki kebaktian.

Ro rimas ni Debata ala ni parboniagaon, na digombarhon songon parau na hona ombak ala adong na so hona tu lomo ni roha ni Debata. Dipaloas Debata do pangunjunan i ro tu jolma i asa sadar jolma i mulak tu Debata, ima ala asi ni rohaNa tu jolma i. Jot-jot do hita lilu di pardalanan ni ngolunta, manimbil sian dalan ni Debata, ima marhite parulaonta di na mangalului ngolu-ngolunta hita, gabe paro rimas ni Debata. Alai ala asi  ni roha ni Debata tu jolma i, di paloas Debata ro pangunjunan i asa sadar hita jala jou-jou tu Debata. Jadi sude parmaraan i boi do i gabe menyadarhon hita asa lam togu haporseaonta tu Tuhantai. Tuise do hita mangalu-alu molo galumbang laut do na ro ? tu pangisi ni laut i do hita marsomba? Molo tu si do hita mangalu-alu, ingkon lam tarsosak/hapit ma hita. Alai molo tu Debata do hita mangalu-alu, gabe las ni roha do ujungna na mar pos ni roha  di labuan hasonangan i. Amen

DEBATA PARHOLONG ROHA

Yeremia 31 : 13.b

Aku akan mengubah perkabungan mereka menjadi kegirangan, akan menghibur mereka dan menyukakan mereka sesudah kedukaan mereka.

Sai na marholong ni roha do tongtong Debata tu angka jolma na tinompa na i. Molo tung diloas pe sipata jolma i mangae angka ragam ni ni sitaonon, ndang na gabe so holong rohaNa di nasida, alai asa tung lam mangantusi jala lam mamboto do roha ni nasida, na Ibana do Tuhan pargogo na so hatudosan na tuk gabe pangalu-aluan jala tung asa gabe muba rohana sian angka hadosaonna. Antong ganup angka namasa tubagasan ngolunta, di las ni roha manang arsak ni roha pe, naeng bilang-bilanganta manang sulingkitanta aha do na pinangido ni roha ni Debata na naeng si ulahonon dohot na naeng si hangoluhononta maradophon Ibana. Boi do tutu ndang pola alani hatangkangonta umbahen na marsitaonon hita, alai na jumotjot do ala ni hatangkangon ni roha dohot dosa na sai manginsombut umbahen na tarrimas Debata jala di pasombu hita satongkin manaon haporsuhon asa tung gabe muba rohanta.

Alai naeng tangkas botoonta, ndang hea marroha mago Debata tu angka jolma na hinaholonganNai, sai na marhapatean asa marujung di bagasan las ni roha dohot hasonangan do tahe sangkapNa. Dipangido jala diparsinta Debata do roha ni jolma i asa sai marsihohot marhaporseaon jala marhaposan tu Ibana, unang tung olo munggil nasida binahen ni manang aha pe na masa tu bagasan ngoluna. Ai ganup halak nasai tongtong togu marhatopothon Ibana do Tuhan jala na sai mangoloi dohot mangihuthon hataNa, manang aha pe arsak ni rohana, ala ni sitaononna tung nagabe muba jala marhaujungan tu las ni roha dohot hasonangan do muse di ujungna. Dibahen i, songon halak Kristen hita, jamot jala tangkas ma hita mangantusi angka namasa tubagasan ngolunta, ganup do hita diantoi Debata dibagasan ngolunta. Molo ala ni dosanta do gabe marsitaonon hita, di igil do hamubaon ni roha na tangkas sian hita huhut laho maninggalhon dosa i, alai molo tung asa lam narhatoguon laho marhaporseaon, so pola ala ni hajahatonta do, lam unduk jala marserep ni roha ma hita laho marsomba tu Ibana. Ai sai na hasonangan do ujung ni ngolu ni halak na sai marsihohot marhaporseaon tu Ibana.